2Th 2 | APZ | STEP | Nakwoe a'amu soku, nakwoe Hwe Engo Jisas asomo nopɨhwosi nakumo menahu'mokone so'no woselɨmonne'no yohono.

2 Thessalonians 2

Anɨtuye hungkunomo hwotoho fe-e'ne sohwo i'mofaponefoho.

1 Nakwoe a'amu soku, nakwoe Hwe Engo Jisas asomo nopɨhwosi nakumo menahu'mokone so'no woselɨmonne'no yohono. 2 A'amu fehohnjo ole maselɨkuji, Nakwoe Hwe Engo sohwoe sɨkuno nto i'mofapohoho. Ose selɨfijo'manji oso hungkunoso hofɨkoe huno mta'ango selohofo. U nom'neso ole maselɨkuji, Anɨtuye Towahuno ole ntohoho, Nakwoe Hwe Engo sohwoe sɨkuno nto i'mofapohoho. Ose woselantɨfeho. U a'amu nom'ne ole maselɨkuji Poul ole mtɨ'mokuma, Hwe Engo sohwoe sɨkuno nto i'mofapohoho. Ose woselantɨfeho. Oso'no selohofo'manji sekwo yomo ikuji sɨmeho wonyo semo'nɨngkuhwoloho. 3 Oso hwasyo hungkuno selɨfijo somo sekwo sɨmeho hi'ntnnono nɨyɨkutoho. Olo sɨkuno loso siki sohonta m'mofaponehoho. Awonoho. Sɨmo'mo a'amu pi'nɨngo engo Anɨtumne'no hahn'nyo ifijoso hwe fihwo Anɨtuye hungkunomo hwotoho fewo'nyo sohwo utɨhwa'nyopo i'mofaponefoho. Oso hwe huhwo sohwo tɨfi no'mo kako tɨkanomo wene hweho. 4 Kako ole ulonefo, Sekwo yo'mayo somne'no hwomtame ehumawo'nɨngkohofoso foho'naopmno. Hunoso ngkine'nohini fɨsyanɨfohupmno. Ose ulɨhwosi Anɨtuye tajo ango engo somo nosyuhwosi osopo nohumahwosi ole ulonefo, Ngko Anɨtu ne hwo'nyoho. Ose ulonefoho.

5 Hohonta sekwo'nji nohumanji olo hilo so'no nto selɨmentohefoho. Sekwo inɨngo laseimaho. 6 Olohonta oso hwe sohwo m'mofapiyoho. Yahino anga'nohinoso oso hwe sohwoe honɨngkanomo pɨjwaofoho. Yahino hiso'no sekwo huno seyohoho. Anɨtu kako oso hwe sohwoe sɨkuno ho'nahumentisoso m'mofapiyoho. 7 Sekwo huno moi'wonoho. Olohonta a'amu fiso Anɨtuye hungkunomo hwotoho feelokwofo. I oso'no a'amu fihwo oso hwe huhwo sohwo kakoe honɨngkanomo nopɨjumofonefoho. Oso honɨngkano pɨku'nnyoso moi'wo imo'nɨngkuhwoso'no oso hwe Anɨtuye hungkunomo hwotoho fe-e'ne sohwo noponefoho. 8 Oso hohosohonta oso hwe Anɨtuye hungkunomo hwotoho fe'ne sohwo utɨhwa'nyopo noponefoho. Osohonta Hwe Engo Jisas kakoe mammtnno'nji hwe huhwo sohumo fonjasyonefoho. Hwe Engo sohwo kakoe pomponaho engo'nji utɨhwa'nyopo nopɨhwosi oso hwe wonyo sohumo nɨhu'nahone wonyo umokonefoho. 9 Oso hwe Anɨtuye hungkunomo hwotoho fe'ne sohumne'no nom'ne hungkuno waselɨmonne'no yohono. Kako Setenɨye yokumpohn'nyo'nji nopɨhwosi hungkuno hwasyo'nji yo'mayo kengo wonyoangkafo hwasyo itɨhwanefoho. A'amu fehohnjoso nuhwonɨngkuji kakimo inɨngkafitnnefoho. 10 Oso a'amu hiso Anɨtuye hungkuno ne'njo somo sɨmeho ufijo'manji Anɨtu kako asomo utɨmanefoho. I oso'no Anɨtuye hungkuno ne'njo nakwolaho lɨfijoso nɨhu'nahone imo'naopitnnefoho. 11 Anɨtu kako hungkuno lahonɨngkuhwosi a'amu hwasyo hungkuno ulɨfitnnefoho. Oso hwasyo hungkuno somo a'amu pi'nɨngoso nupa'nɨngkuji sɨmeho hi'ntnnono uyɨfitnnefoho. 12 Oseso a'amu hungkuno ne'njo somo sɨmeho hi'ntnnono muyoso honɨngkano wonyo somo inɨngkayo so'no umo'nalokusoso hofɨko Anɨtuye tohino engo nomapitnnefoho.

Anɨtu sekumo asomo setɨmayo'ne nto sehwosopo'mentisokuyoho.

13 Nakwoe a'amu soku, Hwe Engo sohwo sekumo sɨmeho sejapɨwo'nɨngkiso soku sɨkuno engolopohamo nakwo sekumne'no Mpohumo isamoyoka ulɨwo'nɨngkuhwantanoho. Oso yahinoso hoponoho. Hohonta Anɨtu asomo setɨmayo'ne sehwosopo'mentisofoho. Oso'no Anɨtuye Towahuno sohwo sekwoe honɨngkano wopɨngo'njo semokahonɨngki sekwo temtitofo kengo sɨmo'mjo soku hungkuno ne'njo somo sɨmeho hi'ntnnono uyɨwo'nɨngkohofo kuyoho. Oso'no Anɨtu asomo nosetɨmanefoho. 14 Anɨtu sekumo olo so'no sehwosopo'mentisofoho. Sɨmo'mo nakwo Anɨtuye hungkuno wopɨngo selɨmentɨhwonefoho. Oso hiso'no sekwo mae'ne sehwosopo'mentisofoho. Oso'no hwangku yo'mayo nakwoe Hwe Engo Jisas Kɨlais sekwoe sɨmeho mo'mo ema'mentisoso asomo setɨmaso sohonta moi'wo esojwaofonefoho. Oso'no sehwosopo'mentisofoho. 15 Oseso nakwoe a'amu soku, sekwo Anɨtumne'no yokumpohn'nyo filohopmno. Oso hungkuno losetɨhwamentɨhwone so'nji ifalifaliyo semtɨ'mokimentɨhwone so'nji aho yokumpohn'nyo kesyohumafɨkuji tɨfi finɨngkamno.

16 Nakwoe Mpohwo Anɨtu kako sɨmeho wopɨngo nejapmmentisofoho. Kako wopɨngo'nohini nalohofonto yo'mayoso siki nejapɨwo'nɨngkisofoho. Kako nakwoe sɨmehomo nasosofitofɨwo'nɨngkisofoho. Oso'no nakwo kako'nji nohumentɨhwane'no hontohumalohwono. 17 Oso'no Anɨtu'nji nakwoe Hwe Engo Jisas Kɨlaisɨ'nji siko sekumo sosofitofosesyohumahosɨsi yokumpohn'nyo semokahonɨngkohosɨsi sekwo yo'mayo hungkuno so'nji yo'mayo syoho so'nji wopɨngo'nohini uyantɨfeho. Oso'no jomo ulalokuhwono.